Laiza FM Radio n'sen hpe 2012 September, 22 ya shani kaw nna shapoi hpang ai rai nna, ya yang buga masha ni Laiza
FM Radio n'sen shapoi lamang hpe madat lu ai majaw grai kabu myit pyaw nga ai lam buga masha ni kawn chye lu ai. Matut na myu sha ni yawng a matu Tai hpyen hpe ning hkap nga ai shawng lam na myu tsaw share shagan ni mung ndai zawn rai Laiza FM Radio n'sen hpe madat lu ai majaw grai kabu ai, myit n gun grai lu la ai lam tsun wa ai.
Myitkyina, Njang Dung kaw nga ai Slg. Jan langai mi, Laiza FM Radio n'sen hpe shani shagu a ten dep grai sharawng let madat ai majaw manang ni kawn Radio kum hpa langai jaw ai lam Slg.Jan, Laiza FM de tsun shana wa ai lam chye lu ai.
Myitkyina mare kaba na Slg. langai mi "Anhte mare buga de nga ai ni ya na zawn Laiza FM hpe madat lu ai majaw grai kabu ai, awm dawm ahkaw ahkang lu sai zawn kabu hkam sha ai, moi gaw Radio madat sai nga yang myen ni na Radio n'sen hkrai hkrai madat ra ai re, ya gaw tinang a amyu sha Ginjaw kaw na shapoi ai hpe nan lu madat ai majaw myit kaw grai kabu hkam sha ai grai ma myit pyaw ai" nga nna shi kabu hkam sha ai lam hpe tsun wa ai re.
Myitkyina, Mayan mare na slg langai mi tsun wa ai hta mung "Anhte Mayan mare masha ni mung Laiza FM Radio shapoi ai hpe na lu ai majaw n dai (2,3) ya laman Mayan mare masha ni mung n-ta shagu ngu na ram Radio kanoi gu hkra mari lang wa saga ai, ya na bat hpang kaw na gaw shiga ni hpe mung shapoi ya sana re nga ai majaw shat kaw si ai hpe pyi sharang kau hkra Laiza FM shiga hpe hkap la madat sana re" nga tsun wa ai.
N0. (2) mungkan majan hta American Kachin Ranger hpyen la galaw lai wa ai Myitkyina, Du mare na Hp.t langai mi mung "1980 ning a ten hta myitkyina Myu Daw Hkan Ma (ၿမိဳ႕ေတာ္ ခန္းမ) e nan hte a atsam n'sen hpe mu yu sai. Dai ni (30) ning jan hta Laiza FM Radio n'sen hpe bai na lu sai, Prat dep madang n'sen, myu sha lam yan masing mung rai sai lam chye lu sai, kabu ai, shakawn ai, chyeju dum ai law, shana yup npyaw ai Insomnia ana kaba hpe Laiza FM Radio n'sen madat nna shamai kau lu sai...chyeju kaba yaw.. kaja ai amu galaw ai ni hpe Karai Kasang mung kashu kasha prat ban matut nna shaman ai chyeju jaw na nga ai. Karai Kasang a chyeju mungga gaw Laiza FM Radio myu sha lam yan matu, Wuhpung Wuhpawng hta lawm nga ai hkum shagu hpe Wunpawng mungdan a n-tsa e prat ban matut nna Karai Kasang a chyeju gaw grin nga u ga ngu nna ngai Myitkyina Du mare Hp.t, No.(2) mungkan majan American Kachin Ranger hpyen la ding la wa chyeju dum shakawn Laiza FM Radio n'sen, da hpran ting shatsam ga tsun n-ngai yaw.." nga nna Laiza FM de chyeju dum ai hte shatsam ga tsun wa ai lam chye lu ai.
Laiza FM Radio n'sen hpe jahpawt hkying 6:00-11:00am ten du hkra rai nna shana daw hkying 5:00-10:00pm ten du hkra Radio Frequency 89.5MHz hte shapoi ya ai re. Laiza FM Radio n'sen a yaw shada ai lam mung, myu sha shada mahkri shawn myit hkrum nga lu na hte mare buga de nga ai myu sha ni hpang de teng man ai shiga ni hpe htawn tsun shapoi ya lu na matu re lam chye lu ai.
Yung Zaw(EEDY)
No comments:
Post a Comment